د نړۍ تر ټولو زيات خپرېدونكى اواز

ژباړه عبدالرزاق حبيبي

د يو نړيوال راپور له مخې په نړۍ كې تر ټولو زيات خورېدونكى اواز اذان ښودل شوى دى ، ددې راپور له مخې هره ورځ اذان دانډونيشيا دختيځو جزيرو څخه د صبح صادق د ختلو سره پيلېږي او په يو وخت كې په زرګونو اذان كوونكي د الله د توحيد او د رسول الله د رسالت اعلانونه كوي ، د ختيځو جزيرو څخه دا پړاو لويديځو جزيرو په لوري حركت كوي او نيم ساعت وروسته د اذانونو دا سلسله د سماټرا په جزيرو كې پيلېږي او د سماټرا په كليو او ښارونو كې د اذانونه له پيلېدو مخكې د ملايا په جوماتونو كې د اذانونو اوازونه پورته شي ، دا سلسله نيم ساعت وروسته د بنګله دېش پايتخت ډاكه ته رسېږي ، په بنګله دېش كې لا اذانونه نه وي ختم شوي چې د كلكتې څخه تر سريلنكا پورې اذانونه پيل شي ، او له كلكتې څخه د هند تر بمبئي پورې ټول اذانونه پيل شي او د هندوستان ټوله فضا د الله د توحيد او د هغه د رسول صلى الله عليه وسلم د رسالت اعلانونه ونيسي ، په هندوستان كې چې اذانونه په ختمېدو شي نو د كشمير په سرې نګر او سيالكوټ كې پيل شي او او له سيالكوټ څخه دا سلسله د پاكستان كراچۍ ، ګوادراو له هغه څخه بيا ټول پاكستان ته ورسېږي په پاكستان كې تر اذانونو ختمېدو وروسته دا سلسله افغانستان او مسقط ته ورسېږي او په دې وخت كې د افغانستان او مسقط تر منځ ټوله فضا اذانونه نيولي وي ، د مسقط څخه تر بغداد پورې د يو ساعت فرق دى په دې وخت كې د سعودي عربستان ، يمن ، متحده عرب امارات ، كويت او عراق سيمه په مسلسل ټول اذانونه په خپله غېږه كې رانغښتې وي د بغداد څخه بيا تر اسكندريې پورې يو ساعت فرق دى په دې كې د اذانونو دا هوا په شام ، مصر، صوماليه او سوډان كې لګېږي ، اسكندريه او استنبول د هېواد په طول او عرض كې واقع كې دي له هغه څخه بيا د ختيځې تركيې پورې د نيم ساعت فرق وي په دې وخت كې د تركيې ټوله فضا اذانونو نيولي وي . د سكندريې څخه بيا تر طرابلس پورې د نيم ساعت فرق دى په دې وخت كې اذانونه په شمالي امريكه ، لېبيا او تيونس كې پيل شي او ټوله فضا بيا دالله توحيد او د رسول الله صلى الله عليه وسلم د رسالت اعلانونه ونيسي ، د سبا د راختلو دا اذان ، چې له انډونيشيا څخه پيل شوي و د نهه نيم ساعته سفر نه وروسته د اقيانونس بحر ختيځو غاړو ته رسېږي ، دا سلسله لا داقيانونس بحر غاړو ته رسېدلي نه وي ، چې په اندونيشيا كې بيا د ماسپښين اذان پيل شي او په دې ډول په ټوله ځمكه كې يوه ثانيه هم داسې نه راځي ، چې په سلګونو، په زرګونو بلكې په لكونو اذان كوونكي دالله د توحيد او د هغه د رسول الله صلى الله عليه وسلم د رسالت اعلان ونه كړي او دا سلسله به تر قيامته پورې جاري وي

 له ننګيال ويب پاڼې څخه په مننه

شعر٫ قلندر مومند

صدمه

لكه يو ستړئ مسافر په تكه توره شپه كښې

دخپل منزل په تكل سترګې دسبا ته ګوري

او ناڅاپي تورې وريځې په اسمان خورې شي

اطراف ترې ورك شي شپه ئې واخلي هرې خواته ګوري

يا دصحرا يو جل وهلئ دابو په طمع

دمارغه پر پسي رادرومي نخلستان ته راشي

چې ناګهانه بيا سته وشليږي بوكه ډوبه شي

او څو ازغي ئې دزړګي تل نه زبان ته راشي

دغسي ستا درفاقت په با چائې لاره كښې

زه بې اسرې بې وسيلې او بې اشنا پاتې شوم

چي داميد آب حيات مې په جهان وېشلو

لكه دخضر په ظلماتو كښې تنها پاتې شوك

ليږونكئ

محمدعلي عمري

سهيلي پښتونخوا مسلم باغ

غزل

تاچي پوري كړو كاجل په تورو سترګو

زه به ليكم اوس غزل په تورو سترګو

محبوبې ته يې سنګدله مهر نه كړې

زما په لور نه كړې كتل په تورو سترګو

چي ليلا او دمجنون تر مينځ فراق شو

خو ليلا پسي ژړل په تورو سترګو

دبڼو غشو يې زما سينه غلبېل كړه

چي مي يار كړئ اورول په تورو سترګو

ما نعيم شاكر يو ځاي كړه يو څو ټكي

ترې نه جوړ شو داغزل په تورو سترګو

په مينه

محمد نعيم شاكر